Skólastefna Tónlistarskóla Rangæinga.

Inngangur

Tónlistarskóli Rangæinga sem starfar samkvæmt lögum um tónlistarskóla, er rekinn af Héraðsnefnd sýslunnar og taka allir hrepparnir innan hennar þátt í rekstri hans. Skólinn nær yfir mjög stórt dreifbýlt svæði og tekur starfsemi og rekstur skólans óhjákvæmilega mið af því að vegalengdir eru miklar bæði fyrir nemendur og kennara. Með starfrækslu öflugs tónlistarskóla er öllum nemendum á grunnskólaaldri og fullorðnum gefinn kostur á tónlistarnámi Rangárþingi.

Stjórnun

Skólanefnd/stjórn – tenging við grunnskólaráð – tenging við foreldra.
Skólastjóri – með fagþekkingu , ábyrgur fyrir stjórnun skólans faglega og rekstrarlega. Ábyrgð á starfsmannastjórnun – sér um ráðningar.
Hlutverk stjórnar: Tengiliður við Héraðsnefnd Rangæingar, ábyrgð á gerð fjárhagsáætlunar og að unnið sé eftir henni, tryggja aðbúnað.

Markmið

Bjóða upp á einstaklingskennslu í hljóðfæraleik og söng.
Veita sambærilega forskólakennslu fyrir alla nemendur 2.- 4. bekkjar í Rangárvallasýslu.
Nemendum gefist kostur á að stunda hluta af tónlistarnámi sínu í samfelldum skóladegi í eigin skóla eftir ósk foreldra.
Stuðla að góðri fagmenntun tónlistarmanna og tónlistarkennara, kennarar eru fyrirmynd.
Að í skólanum starfi fullmenntaðir tónlistarkennarar í sem flestum stöðum við skólann.
Stuðla að eflingu tónlistarlífs í samfélaginu.
Stuðla að menningarlegri upplifun nemenda.
Stefnt að því að styrkja tengsl foreldra við skólann.
Að námsframboð sér sambærilegt á öllum kennslustöðum skólans.
Að leggja áherslu á að kennd sé hefðbundin (sígild) tónlist, en samhliða því fá nemendur að fylgjast með nýjungum í tónlist.
Að leggja áherslu á að hvetja nemendur til að stefna að próftöku á námsferli sínum.

Leiðir

Starfsstöðvar skólans eru þrjár og starfa í nánum tengslum við grunnskóla sýslunnar.
TR starfar í nánum tengslum við grunnskóla sýslunnar. TR sér um forskólakennslu í grunnskólum sýslunnar þar sem öllum nemendum í 2. – 4. bekk býðst grunnnám á hljóðfæri nemendum að kostnaðarlausu.
Skólanámskrá TR taki mið af gildandi lögum úr nýrri aðalnámskrá og greinanámskrám tónlistarskóla þar sem rík áhersla er lögð á að nemendur öðlist áhuga á tónlist og tónlistariðkun.
Prófdæming og námsmat verði samræmt milli deilda.
Nemandi skal eiga lögheimili í Rangárvallasýslu.
Nemandi þarf að hafa náð sex ára aldri til að hefja hljóðfæranám, en undantekningar geta verið eftir þroska nemanda og séreinkennum hljóðfæris.
Kennsla í hliðarnámsgreinum s.s. tónfræði og tónheyrn á fyrsta stigi fer fram inni í hljóðfæratímunum, en síðan í hóptímum.

Samþykkt á fundi Héraðsnefndar Rangæinga 20. maí 2009.

F.h. stjórnar Tónlistarskóla Rangæingar

Eydís Þ. Indriðadóttir

formaður

Stutt ágrip af sögu Tónlistarskóla Rangæinga

Fyrir forgöngu og áhuga Björns Fr. Björnssonar f.v. sýslumanns var ákveðið að stofna tónlistarskóla í Rangárvallasýslu um áramótin 1955-1956 og var Guðmundur Gilsson sem þá var forystumaður og kennari við Tónlistarskóla Árnesinga fenginn til að taka að sér faglega stjórn og kennslu við Tónlistarskóla Rangæinga, sem til skyldi stofnað og gæfi tilefni til skipulegrar kennslu í hljóðfæraleik og tónmennt í sýslunni.

Ákveðið var að Guðmundur kæmi austur einn dag í viku (12klst) yfir vetrarmánuðina. Hófst kennsla í fyrsta sinn 19. október 1956 og var kennt á orgel , píanó og tónmennt og voru nemendur 25 talsins. Fyrsta skólaárinu lauk 1. maí 1957. Skólinn starfaði síðan með sama skólastjóra og líkum hætti en þó með fjölbreyttara hljóðfæravali til ársins 1961 eða í 5 ár og var meðalfjöldi nemenda 21. Að fenginni reynslu þótti eðlilegra að stefna hærra og með meiri fjölbreytni í verkefnum kom fram hreyfing til stofnunar Tónlistarfélags Rangæinga sem tók við rekstri skólans. Var Skúli Þórðarson formaður Tónlistarfélagsins. Tók Trúmann Christiansen skólastjóri Hvolsskóla við stjórn tónlistarskólans og rak hann með oftast einum kennara næstu árin. Var kennt í grunnskólanum og allur rekstur á hendi Trúmanns. Skólagjöld og styrkir s.s. sýslustyrkir fjármögnuðu reksturinn en það háði mjög starfseminni að erfitt var að fá menntaða kennara. Mun starfsemin af þeim sökum hafa legið niðri í 2 ár (1971-1973).

Árið 1976 varð skólinn sameign allra hreppanna í sýslunni og var rekinn af þeim samkvæmt lögum um tónlistarskóla. Árið 1976 nánar tiltekið 1. september tók Sigríður Sigurðardóttir tónmenntakennari við skólastjórn og ráðnir voru 5 kennarar að skólanum. Sigurður Haraldsson í Kirkjubæ var formaður skólanefndar í þau 11 ár sem Sigríður var skólastjóri, en á þessum árum var unnið mikið og erfitt brautryðjendastarf. Sigríður sagði starfi sínu lausu 1. september 1987 og tók Helgi Hermannsson gítarkennari þá við starfi hennar og gengdi því til 1. september 1992, en þá tók Agnes Löve píanóleikari við skólastjórastarfinu.

Skólinn var rekinn samkvæmt lögum um fjárhagslegan stuðning við tónlistarskóla (lög nr. 75 14. júlí 1985) til ársins 1989 en þá voru tónlistarskólar fluttir til sveitarfélaga (lög nr. 87 1989) og hefur Héraðsnefnd Rangæinga rekið skólann síðan og skipað 3 manna skólanefnd. Skólinn var í upphafi 7 mánaða skóli en var haustið 1993 lengdur í sjö og hálfan mánuð og frá hausti 1996 starfaði skólinn í 8 mánuði. Árið 1999 var skólinn lengdur í 9 mánaða skóla þ.e. frá 1. september – 31. maí.

1. september 1999 lét Agnes Löve af störfum sem skólastjóri en við starfi hennar tók Eyrún Jónasdóttir söngkennari við skólann, sem gengdi starfinu til vorsins 2001. Um haustið 2001 tók við starfinu László Czenek núverandi skólastjóri Tónlistarskóla Rangæinga.

Mikið og gott starf hefur verið unnið á undanförnum árum við skólann af þeim sem hafa komið að störfum við hann, mikil þróun hefur verið í hljóðfæranámi, söngkennslu, ásamt forskólakennslu sem er nú samræmd í allri sýslunni. Tónlistarskólinn kennir á nokkrum stöðum í sýslunni, þar á meðal á Laugalandi, Hellu og á Hvolsvelli. Á Laugalandi fær skólinn lánaðar kennslustofur til afnota fyrir tónlistarkennsluna, en á Hellu (Laufskálum 2) og á Hvolsvelli (Við Vallarbraut) hefur skólinn til umráða eigið húsnæði.

Reglugerð fyrir Tónlistarskóla Rangæinga

1. grein. Skólinn heitir Tónlistarskóli Rangæinga. Starfssvæði hans er Rangárvallasýsla. Skólastarfið fer fram í hinum einstöku sveitarfélögum eftir því sem nemendafjöldi gefur tilefni til og ástæður leyfa. Sveitarfélögin sjá skólanum fyrir húsnæði til kennslunnar hvert á sínum stað án þess að greiðsla komi fyrir.

2. grein. Markmiðið með rekstri skólans er að veita almenna tónlistarfræðslu og stuðla að eflingu söngs og tónlistarstarfs í héraðinu.

3. grein. Sveitarfélögin í Rangárvallasýslu reka skólann í sameiningu.

4. grein. Héraðsnefnd Rangæinga fer með æðstu stjórn skólans. Hún kýs þriggja manna skólanefnd og jafnmarga til vara. Skólanefnd skiptir með sér verkum, kýs sér formann, varaformann og ritara. Einnig kýs héraðsnefnd tvo endurskoðendur og tvo til vara. Kjörtímabil skólanefndar og endurskoðenda er sama og héraðsnefndar.

5. grein. Skólanefnd fer með málefni skólans á milli funda héraðsnefndar. Hún ræður skólastjóra í samráði við héraðsnefnd. Skólastjóri ræður kennara í samráði við skólanefnd. Héraðsnefnd getur falið utanaðkomandi aðila að sjá um bókhald og fjármálalega framkvæmdastjórn skólans, að öðru leyti fer skólastjóri með daglega stjórnun skólans og skal hann hafa samráð við skólanefnd um allar meiri háttar ákvarðanir. Skólastjóri og fulltrúi kennara hafa rétt til setu á skólanefndarfundum og hafa þar málfrelsi og tillögurétt. Kennarar skili skólastjóra skýrslu um kennslu sína mánaðarlega.

6. grein. Héraðsnefnd ákveður hámark kennslustunda fyrir hvert skólaár og skal það gert ekki seinna en 30. júní.

7. grein. Nemendur Tónlistarskólans greiði nemendagjöld sem skólanefnd ákveður á hverjum tíma. Þau skulu greiðast áður en kennsla hefst á hverri önn. Annan reksturskostnað skólans greiða aðildarsveitarfélögin á þann hátt að 40% kostnaðarins greiðist í hlutfalli við íbúafjölda 1. desember næst á undan, en 60% kostnaðarins greiðist í hlutfalli við nemendafjölda sveitarfélaganna, þannig að tveir ½ tímar reiknast einn og samkennsla tveggja eða fleiri nemenda reiknast hlutfallslega á sama hátt. Séu greiðslur til skólans ekki inntar af hendi á tilskyldum tíma reiknast dráttarvextir á skuldina.

8. grein. Reikningsár Tónlistarskóla Rangæinga er almanaksárið. Skólanefnd gerir frumvarp að fjárhagsáætlun og leggur fyrir héraðsnefnd, skal fjárhagsáætlun afgreidd á vetrarfundi.

9. grein. Sveitarsjóðir aðildarfélaganna bera einfalda ábyrgð á skuldbindingu skólans en innbyrðis skiptist ábyrgðin í hlutfalli við íbúatölu samkvæmt ákvæðum 98. greinar sveitarstjórnarlaga.

10. grein. Ársreikningar skólans skulu lagðir fyrir fund héraðsnefndar eigi síðar en á vorfundi.

11. grein. Nemendatónleikar skulu haldnir í lok hvers skólaárs og oftar ef skólastjóra þykir ástæða til.

12. grein. Reglugerð þessi tekur gildi þegar Héraðsnefnd Rangæinga hefur samþykkt hana með ¾ hlutum atkvæða.

Lög um fjárhagslegan stuðning við tónlistarskóla

1985 75 14. júlí.

1. kafli. Stofnun tónlistarskóla.

1. gr. Með stofnun tónlistarskóla er í lögum þessum átt við skóla sem fullnægir eftirtöldum skilyrðum :........ 1) Hefur a.m.k. einn fastan kennara auk stundakennara. 2) Starfar minnst sjö mánuði á ári og lýkur með prófum og opinberum nemendatónleikum. 3) Kennir samkvæmt námsskrá útgefinni af menntamálaráðuneytinu eða námslýsingu sem hlotið hefur staðfestingu ráðuneytisins ef námsskrá skortir, hverjum nemenda skal veitt kennsla í aðalnámsgrein eina stund á viku, auk þess séu a.m.k. tvær aukagreinar kenndar í hóptímum (tónfræði, tónheyrn, tónlistarsaga og samleikur). 4) Hefur a.m.k. 30 nemendur sem stunda nám til viðurkenndrar prófraunar. 5) Hefur hlotið sérstakt samþykki menntamálaráðuneytisins og jafnframt samþykki viðkomandi sveitarstjórnar ef skóli er rekinn af þriðja aðila.

2. gr. Ef sveitarfélag vill koma á fót tónlistarskóla skal sveitarstjórn semja reglugerð um skólann sem ráðherra staðfestir. Skal þar m.a. kveðið á um yfirstjórn skólans og ráðningu starfsmanna sem teljast munu starfsmenn sveitarfélagsins. Ef fleiri en eitt sveitarfélag ákveða að koma á fót tónlistarskóla í sameiningu skal reglugerðin samin og samþykkt af viðkomandi sveitarstjórnum og þar m.a. kveðið á um skiptingu kostnaðar og ábyrgðar af skólahaldinu. 3. gr. Aðrir aðilar en sveitarfélög geta sett á fót tónlistarskóla sem njóta styrks skv. ákvæðum laga þessara. Áður en slíkur skóli hefur starfsemi skal senda greinargerð um fyrirhugaða stofnun hans til viðkomandi sveitarfélags og menntamálaráðuneytisins. Skal þar greint frá því m.a. hverjir séu stofn- og ábyrgðaraðilar skólans, hvaða húsnæði hann hafi til afnota og hvaða greinar tónlistar ætlunin sé að leggja áherslu á. Greinargerðin skal hafa borist viðkomandi sveitarfélagi eigi síðar en 15. apríl ásamt rekstraráætlun og drögum að starfsreglum fyrir skólann. Sveitarstjórn skal fjalla um greinargerðina og taka afstöðu til þess hvort hún fallist á greiðslur til skólans úr sveitarsjóði. Ef fyrirhugað starfsvæði skólans er fleiri en eitt sveitarfélag skulu viðkomandi sveitarstjórnir fjalla um málið á sama hátt og skal þá jafnframt taka afstöðu til þess hverning kostnaðarskipting skal vera milli sveitarsjóða og hver skal vera greiðsluaðili fyrir skólann. Skólanefnd, skipuð fulltrúum eignaraðila, fjallar um málefni skólans og fer með fjárreiður hans. Viðkomandi sveitarfélag skal ávallt eiga fulltrúa í nefndinni. L.87/1989 65. gr.

4. gr. Stofnkostnaður tónlistarskóla greiðist af stofnendum hans. L.87/1989 66. gr.

5. gr. Tónlistarskólar þeir, sem starfandi eru og styrk hafa hlotið fyrir gildistöku laga þessara, skulu halda staðfestingu sinni enda fullnægi þeir lágmarkskröfum skv. lögum þessum. Ef skóli er rekinn á vegum sveitarfélags skal semja reglugerð skv. ákvæðum 2. gr. eigi síðar en 6 mánuðum frá gildistöku laganna. Ef skóli er rekinn á vegum annarra aðila, skal senda menntamálaráðuneytinu starfsreglur hans innan sama tíma .

6. gr. Ef tónlistarskóli, sem styrks hefur notið, hættir störfum skal sveitarfélagið varðveita eignir skólans (hljóðfæri o.fl.) þar til eignanna er þörf við rekstur annars tónlistarskóla á sama starfssvæði.

2. Kafli. Rekstur tónlistarskóla.

7. gr. Sveitarfélög, sem reka tónlistarskóla, greiða launakostnað kennara og skólastjóra. L.87/1989 67. gr.

8. gr. Tónlistarskólar, sem eigi eru reknir af sveitarfélögum, skulu senda áætlun um kennslu á næsta fjárhagsári til viðkomandi sveitarstjórnar eigi síðar en 1. maí ár hvert. Skal jafnframt í greinargerð skýra fyrirhugaðar breytingar á kennslu og kennslumagni. Sveitarstjórn skal taka afstöðu til áætlunar skólans og gera samkomulag við skólastjórn um kennslu og starfsmannahald fyrir 1. júlí ár hvert. L.87/1989 68. gr.

9. gr. Starfsmenn tónlistarskóla, sem eigi eru reknir af sveitarfélögum, en njóta styrks skv. lögum þessum, skulu njóta launa í samræmi við kjarasamninga sem launanefnd sveitarfélaga gerir við stéttarfélög þeirra á hverjum tíma, en þeir teljast starfsmenn viðkomandi skóla nema öðruvísi sé við þá samið. Þeim er heimil þátttaka í söfnunarsjóði lífeyrisréttinda eða öðrum þeim lífeyrissjóði sem viðkomandi starfsmaður á aðgang að. L.89/1989 69. gr.

10. gr. Tónlistarskólar, sem eigi eru reknir af sveitarfélögum, skulu fá greiddan úr sveitarsjóði launakostnað kennara og skólastjóra í samræmi við rekstraráætlun og þær breytingar sem verða á launatöxtum í samræmi við framangreinda kjarasamninga. Greiðsla skal fara fram mánaðarlega skv. nánara samkomulagi milli skólastjórnar og sveitarstjórnar. L.87/1989 70. gr.

11. gr. Tónlistarskólar skulu innheimta skólagjöld. Skólagjöldum er ætlað að standa undir öðrum kostnaði við skólareksturinn en launakostnaði kennara og skólastjóra, að svo miklu leyti sem rekstrarkostnaðurinn er ekki borinn af styrktarmeðlimum eða annarri fjáröflun.

12. gr. Menntamálaráðuneytið skal hafa með höndum faglega umsjón og eftirlit með tónlistarkennslu. Ráðuneytið ræður í þessu skyni námsstjóra tónlistarfræðslunnar til fjögurra ára í senn svo og annað nauðsynlegt starfslið. Verkefni ráðuneytisins eru m.a.: Yfirstjórn námskrár- og námsefnisgerðar, sbr. 3. tölul. 1. gr., samræming náms, prófa og réttinda er þau veita, aðstoð varðandi ráðningar kennara, ráðgjöf varðandi gerð starfs- og fjárhagsáætlana skóla, upplýsingamiðlun og erlend samskipti. L.87/1989 71. gr.

13. gr. Ráðuneytið skipar fimm manna samstarfsnefnd tónlistarfræðslunnar til að fjalla í heild um starfsemi tónlistarskóla, samstarf skólanna og/eða rekstraraðila þeirra svo og samstarf tónlistarskóla við grunnskóla og framhaldsskóla. Í nefndinni eiga sæti einn fulltrúi tilnefndur af Sambandi ísl. sveitarfélaga, einn fulltrúi tilnefndur af Samtökum tónlistarskólastjóra, einn fulltrúi tilnefndur af Félagi tónlistarskólakennara, námsstjóri tónmennta í grunnskólum, skipaður án tilnefningar, námsstjóri tónlistarfræðslunnar, skipaður án tilnefningar og er hann jafnframt formaður nefndarinnar. L.87/1989 71. gr.

Aðstaða skólans

Tónlistarskólinn kennir á þremur stöðum í sýslunni, á Hellu, Hvolsvelli og Laugalandi. Á Hellu hefur skólinn til eigin umráða húsnæði að Laufskálum 2, sem innheldur fjórar kennslustofur, kennarastofu og biðstofu fyrir nemendur og á Hvolsvelli hefur skólinn aðstöðu í tveimur húsum við Vallarbraut, þar sem í öðru húsinu eru þrjár kennslustofur og í hinu er skrifstofa og aðstaða fyrir kennara, einnig hefur skólinn aðgang að kennslustofum í Hvolsskóla. Fyrirhugað er innan fárra ára að byggja nýjan tónlistarskóla á Hvolsvelli, sem verður samtengdur Hvolsskóla. Á Laugalandi fær skólinn aðgang að kennslustofum eftir þörfum.

Fyrir músíkfundi og tónleika fær skólinn aðstöðu á ýmsum stöðum í sýslunni, t.d. Íþróttahúsunum á Laugalandi og Þykkvabæ, Safnaðarheimilinu á Hellu, Þykkvabæjarkirkju, Stórólfshvolskirkju, Breiðabólsstaðarkirkju, Samkomuhúsinu á Heimalandi, Gryfjunni í Hvolsskóla og Kringlunni í Grunnskólanum á Hellu. Einnig heldur Tónlistarskólinn tónleika fyrir aldraða í Dvalarheimilinu Lundi á Hellu og Dvalarheimilinu Kirkjuhvoli á Hvolsvelli.